Balew!

Tatahol tahol ako ngayon. Nahawa ata ako sa kaklase kong si Bebe. Nahawa siya sa kapatid niyang si Dyego. Papak na ako ng papak ng Istrepsils kaso ang kati pa din. Kung pwede lang kamutin e. *tsk*

Medyo maaga ako nakauwi ngayon. 5:30. Di ako nakasilay kanina e. Sayang. Dumating ako sa bahay, kumain agad ng hapunan. Hindi kasi ako nakakain kaninang tanghali. Masyadong madaming ginagawa. Hektik ang skedyul. Kaya 3:00 pa lang e kumukulo na ang tiyan ko. Masarap ang ulam. Burger patties, gravy, gulay. Medyo napadami kain ko. Kumain din ako ng dalawang maliliit na piraso ng saging. At dalawang kalahating pisngi ng mangga. Ok na din. Busog na.

Umakyat ako sa kwarto ko. Naghubad ng sapatos. Naghubad ng medyas. Umupo sa kama. Tumingin sa paligid. Anlaki ng kwarto ko. Tatlo ang kama. Isang queen size sa gitna. Dalawang single sa magkabilang gilid. May book shelf na puno ng libro at gamit. Tukador na puro pabango. At ang pinakamatindi, may dvd player kaso walang tv.

Sinaksak ko ang lobat kong cellphone. Nagpunta sa cabinet. Nanguha ng damit. Nagpunta sa banyo, nagbihis. Bumaba ako ng bahay. Pumunta sa dining area. Sa lamesa may dinatnan akong kahon ng tsokoleyt. Waw. Nakakatakam. Binuksan ko. Dalawang piraso na lang ang laman. Nagmamakaawa lalamunan kong wag kumain. Kating kati na siya. Kaso dahil sa kakulitan ko e inabot ko ang tsokoleyt at kinain yung dalawang piraso. Ang sarap. Waw. Imported. May macadamia pa. Agad akong pumunta sa kusina at uminom ng tubig tska centrum.

Umupo ako sa lamesa. Nagbuklat ng mga notebook. May assignment pala sa chemistry, kaso wala akong periodic table. Gagawa pa nga pala ng reaction paper sa advanced biology. Makapagcomputer na nga.

Binuksan ko ang computer. Hindi ko pa alam kung ano ano ang mga ilalagay sa reaction paper. Medyo mahirap kasi pasiyahin yung teacher namin doon. Yung pelikula kasi tungkol baga sa mga clone. Naisipan ko na lang magedit ng mga picture. Kaso sa bawat pindot sa Adobe Photoshop, limang minuto ang hihintayin bago makapindot uli. Habang naghihintay ng pagkatagal tagaaaaaaaaaaal na loading sa photoshop e nadukdok ako sa keyboard. Nakatulog.

Paggising ko, tapos na magload. Tinignan ko ang orasan. Hala! 12:30 na ng umaga! Bakit kaya hindi ako ginising nina mama? Sana hindi sila magalit kasi nagpuyat ako. Tumingin ako sa paligid. Parang medyo may iba. Sa tabi ng computer ko, may isa pang computer. Kamukang kamuka. At kasinbagal din naman. Tumingin ako sa kaliwa. Yung lamesa naging dalawa, yung kahon ng tsokoleyt dalawa na din. Medyo nagsisi ako sa pagkain kanina. Edi sana pala apat na tsokoleyt ko ngayon. Sayang naman. Bumalik ako sa realidad. Tumingin ako sa kanan, yung dating apat na sofa, walo na ngayon! DVD player, tv, wii, speakers, lahat nadoble. Magkamukang magkamuka pati ung mga gasgas. Medyo nagulo din ako.

Lumabas ng kwarto si mama. Nakapantulog. Tinanong niya kung bakit gising pa ako. Parang hindi man lang siya nagulat sa doble doble naming gamit. Pinatay ko na ang dalawang computer, pinatay ang sandamakmak na mga ilaw, at umakyat sa kwarto ko. Awa ng Diyos hindi naman nadoble yung hagdan.

Pagpasok ko sa kwarto, doble din lahat, dalawang book shelves, dalawang queen size na kama, apat na single. Bawat pabango nadoble, at ang pinakamatindi, dalawang dvd player, kaso wala pa ding tv. Sa sobrang hilo sa mga nakikita ko, pumunta ako sa isa sa dalawang queen size na kama. Paghiga ko may naramdaman ako. Kakaiba. Hindi naman yung tidibir na bigay ng pinsan ko. Napatayo ako. Pagtingin ko may nakatalukbong ng kumot. Ninerbyos ako. Sino kaya to? Ndi naman umuwi ate ko. Kinalabit ko sya, sabay layo. Baka mamaya e si sadako na yun. Di siya kumibo. Kinalabit ko ulit. Mejo nakakakilabot kasi parang nairita pa. "Anu ba?" sabe nya. Pamilyar ung boses nya. Kinabahan ako. Hindi ito maaari. Tinanggal ko ang kumot. Suot nya ang paborito kong pantulog! Pambihira. Nilakasan ko na yung kalabit ngayon at sabing "Hoy pantulog ko yan bet suot mo?". Sumagot siya, "Ano ba puyat ako kakaPhotoshop ay patulugin mo nga ako!". Nagulat ako. Umikot ako sa kama. Tinignan ko ung muka nya. OMG. Parang nakaharap ako sa salamin. Kaya pala parang ako siya kung umiwas sa nanggigising. Kaya pala suot nya ang paborito kong pantulog. Kaya pala napuyat din siya kakaPhotoshop. Dumilat siya. Napasigaw kaming parehas. Nahulog siya sa kabilang dulo ng kama. Tumayo siya bigla at tumingin sa paligid. Gulat din siya tulad ko. "Sino ka?" tanong niya. "Joselle" sagot ko. "Ha? Eh ako si Joselle.". Isa lang ang pumasok sa isip ko. Sino ang tunay na Joselle? Paano kung hindi ako? Ano mangyayari? Papaalisin kaya nila ako? Susunugin kaya nila akong buhay? Pangalawang pumasok naman sa isip ko, meron din kayang kakambal sina mama? Baka magkakatabi din sila sa kama? "Hoy!" sigaw niya sakin. Di ko napansin matagal na din pala akong nakatulala. Wala na akong nagawa. Andami ko nang iniisip. Pagod ako. Wala pa akong reaction paper. Lagot na. Nawalan ako ng malay.

Nagising na lang ako sa parehas na lugar kung san nawalan ako ng malay. Napatayo ako. Lalo akong naguluhan sa nakita. Bumalik sa dati ung lahat. Isang queen size na kama, dalawang single, mga pabango, isang book shelf, isang dvd player, walang tv. Tinignan ko ang oras. 12:30 ng umaga. Nanaginip lang kaya ako? O isang buong araw nkong walang malay dito? Ano na kayang date ngayon? Anong araw kaya ngayon? Sinubukan ko nlang kalimutan ung nangyari. Naligo ako. Sinet ang alarm clock. Pinatay ang ilaw. Natulog.

Nagalarm na ung relo. Antok na antok pa ako. Bet kaya? Parang hindi pa ako nakakatulog ay. Tinignan ko ang oras. 12:30! Natakot na ako. Pambihira na to. Binuksan ko ang ilaw. Normal pa naman ang paligid. Naisip kong baka ginalaw lang ng katulong ung alarm clock ko. Pinatay ko nlang para sigurado. Bumalik na ako sa kama, natulog.

Nagising na ako. Ang sakit ng ulo ko. Ang sakit ng likod ko. Tinignan ko ang oras. 12:30! Ano yun 24 hours na akong natutulog? Anong araw ba ngayon? Wala bang pasok? Grabe na talaga to.

Lumabas ako ng kwarto, bumaba at pumunta sa kwarto nina mama. Kumatok sa pinto. Matagal tagal bago nila buksan. Nagulat sila bet umaga na e andon pko. Tinanong ko kung anong araw na ba ngayon at kung anong date. February 6 daw, Biyernes. Nagulat ako. February 5 nagsimula ang lahat. Yung pagdating ko sa bahay ng maaga, pagpapak ko ng Istrepsils, pagkain ko ng tsokolate, pagkakaroon namin ng doble dobleng gamit, pagkakita ko sa kakambal ko. Lahat ng yon sa gabi ng February 5. 6 pa lang ngayon. Birthday nga pala ni Bebe. Ano kayang nangyari? Natulog lang ba ako sa kwarto magdamag tas nanaginip ng ganon kabongga? Antindi.

Umakyat nlang ako uli sa kwarto. Isip ng isip kung anong nangyari. Pumasok ako sa banyo para maghilamos. Pagkahilamos mejo gumaan na pakiramdam ko. Kaso nung magtutuyo na ako ng muka, kinilabutan ako. Dalawa ang tuwalya, parehas ang kulay. Ano?!

Note: 1. Hindi ko na alam kung ano ang sumunod na nangyari.
2. Noong February 5 ko pa dapat to ipopost kaso ngayon ko lang natapos.
:)